راولپنڈی: ڈی جی آئی ایس پی آر نے جوائنٹ پریس کانفرنس میں بین الاقوامی میڈیا کے سامنے بھارتی جھوٹ کا پردہ چاک کر دیا۔
ڈی جی آئی ایس پی آر اور سینئر ائیر فورس آفیسر نے مشترکہ پریس کانفرنس میں بھارتی رافیل طیارے گرانے کے ناقابلِ تردید ثبوت پیش کیے۔ ثبوتوں میں بھارتی طیاروں کے نمبرز اور تباہ ہونے کی لوکیشنز بھی دکھائی گئیں۔
لیفٹیننٹ جنرل احمد شریف چوہدری نے کہا کہ 6 اور7 مئی 2025 کی رات پاک فضائیہ اور بھارتی طیاروں کے درمیان پاک بھارت تاریخ کا طویل معرکہ ہوا۔ ایک گھنٹے سے زیادہ اس فضائی جنگ کے دوران پاک فضائیہ کے شاہنیوں نے 5 بھارتی طیارے مار گرائے۔ تباہ کیے جانے والے بھارتی طیاروں میں 3 جدید رافیل طیارے، ایک مگ 29 اور ایک SU-30 شامل تھے۔
انہوں نے کہا کہ بھارتی روایتی ہٹ دھرمی اور جھوٹ نے طیارے گرنے کی خبر سے انکار کیا۔ لیکن کچھ بھارتی میڈیا چینلز نے طیارے گرنے کی خبروں کی تصدیق کی۔ جو بعد میں مودی سرکار نے ہٹوا دیں۔
ڈی جی آئی ایس پی آر نے کہا کہ بھارت کے مطابق ہمارا کوئی طیارہ نہیں گرا۔ جبکہ بھارتی میڈیا خود طیارہ گرنے کی خبروں کی تصدیق کر رہا ہے۔ طیارہ گرنے کی پہلی خبر “انڈیا ٹوڈے” نے جموں کشمیر کے علاقے پامپور سے دی۔
انہوں نے کہا کہ انڈیا ٹوڈے نے مقبوضہ جموں و کشمیر کے 3 علاقوں میں طیارے گرنے کی تصدیق کی۔ بھارتی فضائیہ کے طیارے گرنے کی فوٹیجز میں طیاروں کا ملبہ بخوبی دیکھا جا سکتا ہے۔ کہ طیارے کی “ٹیل” بھارتی 17گولڈن ایرو اسکاڈرن کے رافیل BS-001 طیارے کی ہے۔
لیفٹیننٹ جنرل احمد شریف چوہدری نے کہا کہ فوٹیج میں تباہ ہونے والے طیارے کے انجن کو بھی دکھایا گیا۔ جو بھارتی طیارے کا ہے۔ ہم 21ویں صدی میں رہ رہے ہیں نہ کہ 18ویں صدی میں۔ اور ہر چیز اپنا نشان چھوڑ جاتی ہے۔ بی بی سی کے نمائندے نے مقبوضہ جموں وکشمیر سے رپورٹنگ کرتے ہوئے کہا تھا کہ پامپور کے علاقے میں رات کو دھماکے کی آواز سنی گئی جو طیارہ گرنے کی تھی۔ ایسا ہی ایک اور دھماکا جموں کے رام بن کے علاقے میں بھی ہوا۔
انہوں نے کہا کہ بھارتی صحافی پراوین سواہنے نے بھی 6 اور 7 مئی کی رات جموں و کشمیر میں بھارتی فضائیہ کے 3 جیٹ طیاروں کی تباہی کے شواہد دیتے ہوئے کہا کہ “انڈین ایکسپریس اور دی ہندو اخبار” نے بھٹنڈا کے قریب ایک اور بھارتی طیارہ گرنے کی خبر دی۔ لیکن “دی ہندو” نے 40 منٹ کے بعد بھٹنڈا کے قریب طیارہ گرنے کی خبر ہٹا دی۔
ڈی جی آئی ایس پی آر نے کہا کہ یہی نہیں بھارتی صحافی پراوین سواہنے اور کرن تھاپر کو معروف بھارتی میڈیا پلیٹ فارم “دی وائر” کے پروگرام میں سچ بولنے پر بلاک کر دیا گیا۔
انہوں نے کہا کہ پاک فضائیہ نے دفاعی کارروائیاں پاکستان کی خودمختاری کا تحفظ کرتے ہوئے سر انجام دیں۔