سکیورٹی فورسز نے پاک افغان سرحد پر خوارج کی دراندازی کی کوشش ناکام بناتے ہوئے 5 مبینہ خودکش حملہ آوروں کو گرفتار کر لیا۔
سکیورٹی ذرائع کے مطابق 17 جولائی کی شام 5 بجے خوارج نے پاک افغان سرحد سے پاکستانی حدود میں داخل ہونے کی کوشش کی، سکیورٹی فورسز نے اطلاع ملتے ہی پانچ مقامات پر ناکہ بندی کی اورشام 6 بجکر 25 منٹ پر خوارج سرحد سے پاکستانی حدود میں داخل ہوئے۔
حملہ آوروں نے عزیز خیل اور منڈی خیل کی سمت پیش قدمی کی جہاں فورسز کی موجودگی کے باعث خوارج نے بیسی خیل کی مسجد میں پناہ لے لی ،سکیورٹی فورسز نے خوارج کو مسجد میں پناہ لیتے ہوئے گھیر لیا، جس پر دہشتگردوں نے ہتھیار ڈال دیئے۔
گرفتار ہونے والے تمام خوارج افغان شہری ہیں جن کی عمریں 15 سے 18 سال کے درمیان ہیں، جبکہ تین ملزمان کے پاس افغان شناختی کارڈ بھی موجود ہیں، تمام خوارج کو تفتیش کیلئے نامعلوم مقام پر منتقل کر دیا گیا ہے۔