پاکستان نے آپریشن سندور سے متعلق بھارت کے بیانات مسترد کردیے، کسی بھی جارحیت کا بھرپور جواب دینے کا اعلان کردیا۔ ترجمان دفتر خارجہ بولے بھارت آپریشن مہادیو کے نام پر معصوم لوگوں کو نشانہ بنارہا ہے، وزیراعظم نے پہلگام واقعے کی غیرجانبدار تحقیقات کی پیشکش کی، پاکستان خطے میں امن کا خواہاں ہے۔
ہفتہ وار پریس بریفنگ دیتے ہوئے ترجمان دفتر خارجہ شفقت علی خان کا کہنا تھا کہ بھارتی لوک سبھا میں آپریشن سندور سے متعلق بھارتی رہنماؤں کے الزامات اور اشتعال انگیز دعوے بے بنیاد ہیں، بھارتی بیانات حقائق کو مسخ کرنے اور جارحیت کو جواز دینے کی کوشش ہیں، آپریشن مہادیو کی ہمارے نزدیک کوئی اہمیت نہیں، بھارتی وزیر داخلہ کا بیان کہانیاں ہیں۔
انہوں نے کہا کہ پہلگام حملے کی تحقیقات کے بغیر بھارت نے پاکستان پر حملہ کیا، 6 اور 7 مئی کی درمیانی رات بھارت کے حملے میں معصوم شہری شہید ہوئے، بھارت اپنے اسٹریٹجک اہداف حاصل کرنے میں مکمل ناکام رہا جبکہ پاکستان نے بھارتی طیاروں اور اہداف کو نشانہ بناکر کامیابی حاصل کی۔
ترجمان دفتر خارجہ کا کہنا تھا کہ بھارتی رہنماء اپنے نقصان تسلیم کریں اور تیسرے فریق کے کردار کو مانیں، پاکستان نے شفاف اور آزادانہ تحقیقات کی پیشکش کی تھی جو بھارت نے مسترد کردی، بھارت نے جارحیت کا راستہ اپنایا اور خود ہی جج، جیوری اور ایگزیکیوشن بن گیا، مئی 2025ء میں پاکستان نے بھارتی جارحیت کا بھرپور جواب دیا۔
شفقت علی خان کا مزید کہنا تھا بھارت کے نیو نارمل کے بیانات کو یکسر مسترد کرتے ہیں، ہمارے نزدیک تعلقات کا واحد اصول خود مختاری کا احترام اور اقوام متحدہ چارٹر پر عمل ہے، پاکستان پر ایٹمی بلیک میلنگ کے بھارتی بیانیے کو مسترد کرتے ہیں، پاکستان نے بھارت کو روایتی صلاحیتوں کے ذریعے روکا۔
انہوں نے کہا کہ بھارتی رہنماؤں کے سندھ طاس معاہدے سے متعلق بیانات بے بنیاد ہیں، بھارت کا معاہدے کو معطل کرنا بین الاقوامی معاہدوں کی توہین ہے، بھارت کا یکطرفہ اور غیرقانونی کارروائی پر فخر افسوسناک ہے۔
ترجمان دفتر خارجہ کا کہنا تھا کہ بھارت غلط معلومات، جنگی جنون اور بڑھک بازی سے خطے کو غیر مستحکم کر رہا ہے جبکہ پاکستان خطے میں امن، استحکام اور بامقصد مذاکرات کا خواہاں ہے۔
شفقت علی خان نے ہفتہ وار بریفنگ میں مزید کہا کہ 25 جولائی کو نائب وزیراعظم نے نیویارک سے واشنگٹن کا دورہ کیا، نائب وزیراعظم نے واشنگٹن میں امریکی سیکریٹری خارجہ سے ملاقات کی، پاکستان نے حالیہ پاک بھارت جنگ بندی میں امریکی کردار کو سراہا، نائب وزیراعظم نے فلسطین، مصر، کویت، ناروے، بنگلادیش کے رہنماؤں سے ملاقاتیں کیں، انہوں نے نیویارک میں امریکی پاکستانیوں سے بھی ملاقات کی، اسحاق ڈار نے فلسطین پر اقوام متحدہ کانفرنس میں پاکستان کی نمائندگی کی اور فلسطین کے مسئلہ کے 2 ریاستی حل پر زور دیا۔
ترجمان دفتر خارجہ کا کہنا ہے کہ پاکستان ملائیشیا کے ذریعہ کمبوڈیا تھائی لینڈ جنگ بندی کا خیر مقدم کرتا ہے، چینی نمائندہ خصوصی برائے افغانستان نے سیکریٹری خارجہ سے ملاقات کی۔
انہوں نے بتایا کہ ایرانی صدر مسعود پزشکیان 2 اگست سے 2 روزہ دورے پر پاکستان آرہے ہیں ، دورے میں وہ صدر مملکت اور وزیر اعظم سے ملاقاتیں کریں گے، ڈاکٹر مسعود پزشکیان کا یہ پہلا دورۂ پاکستان ہے۔