وزیراعلیٰ خیبرپختونخوا علی امین گنڈاپور نے بھارت کے خلاف فیٹف جانے کا اعلان کرتے ہوئے ویڈیو پیغام میں کہا، ”مودی، میں تمہاری طرح بزدل نہیں کہ رات کی تاریکی میں آؤں، ہم نعرہ لگا کے آتے ہیں۔“ انہوں نے کہا کہ بھارت نے ان کا غلط بیانیہ پیش کر کے پاکستان کو فیٹف کی گرے لسٹ میں ڈالوانے کی کوشش کی۔
وزیراعلیٰ خیبرپختونخوا علی امین گنڈاپور نے بھارت کے خلاف FATF (فنانشل ایکشن ٹاسک فورس) میں جانے کا اعلان کرتے ہوئے بھارتی وزیراعظم نریندر مودی کو دوٹوک پیغام دیا ہے۔ اپنے ویڈیو بیان میں انہوں نے کہا کہ بھارت نے ان کا بیان توڑ مروڑ کر پیش کیا اور پاکستان کو FATF کی گرے لسٹ میں ڈالوانے کی کوشش کی۔
علی امین گنڈاپور نے کہا کہ مودی! میں تمہیں پیغام دے رہا ہوں، ہم تمہاری طرح بزدل نہیں جو رات کی تاریکی میں آئیں۔ ہم نعرہ لگا کر آتے ہیں، دشمن کو بتا کر آتے ہیں۔ انہوں نے کہا کہ بھارت کو FATF کی گرے لسٹ میں شامل کرانے کے لیے وہ خود ثبوتوں کے ساتھ عالمی فورمز پر جائیں گے اور یہ ثابت کریں گے کہ انڈیا گرے لسٹ میں جانے کے لیے سو فیصد فٹ ہے۔
وزیراعلیٰ نے مزید کہا کہ بھارت آج سے نہیں، بلکہ ہمیشہ سے پاکستان، خصوصاً بلوچستان، گلگت بلتستان اور خطے میں دہشتگردی میں ملوث رہا ہے۔ انہوں نے کہا کہ افغان جنگ کے دوران بھارت نے 100 سے زائد قونصل خانے کھول کر پاکستان میں دہشت گردی کو ہوا دی۔ ان کا کہنا تھا کہ چینی باشندوں اور تنصیبات پر ہونے والے حملوں کے تانے بانے بھی بھارت سے جا ملتے ہیں۔
علی امین گنڈاپور نے کہا کہ پاکستانی حکومتیں، دفاعی ادارے، عوام اور پوری قوم ملک کے دفاع کے لیے متحد ہیں اور ہر محاذ پر بھارت کے جھوٹے پراپیگنڈے کا بھرپور جواب دیا جائے گا۔
واضح رہے کہ 21 اکتوبر 2022ء کو فنانشل ایکشن ٹاسک فورس (ایف اے ٹی ایف) کی گرے لسٹ میں تقریباً 52 ماہ شامل رہنے کے بعد پاکستان کا نام اس فہرست سے نکال دیا گیا تھا۔
”کلبھوشن یادیو، بھارت کی دہشت گردی کا واضح ثبوت ہے“
خیبرپختونخوا کے مشیر اطلاعات بیرسٹر سیف نے شدید ردعمل کا اظہار کیا ہے۔ انہوں نے کہا کہ بھارت نے وزیراعلیٰ خیبرپختونخوا علی امین گنڈاپور کے بیان کو توڑ مروڑ کر پیش کیا ہے۔ بیرسٹر سیف نے یہ بھی کہا کہ بھارت کا فیٹف کی گرے لسٹ میں پاکستان کو شامل کرنے کا خواب کبھی پورا نہیں ہوگا۔
انہوں نے کہا کہ کلبھوشن یادیو پاکستان میں بھارتی دہشت گردی کا واضح ثبوت ہے اور کے پی میں بھارت کی دہشت گردانہ سرگرمیوں کے شواہد موجود ہیں۔ بیرسٹر سیف نے اس بات پر زور دیا کہ پاکستان بھارت کے دہشت گردی میں ملوث ہونے کے شواہد فیٹف حکام کے سامنے پیش کرے گا۔
بیرسٹر سیف کا کہنا تھا کہ جنگ میں شکست کے بعد بھارت اوچھے ہتھکنڈوں پر اتر آیا ہے جبکہ دہشت گردی کے پیچھے بھارت کا ہاتھ ہے۔ انھوں نے مزید کہا کہ بھارت کی جانب سے پاکستان کے خلاف بڑھتی ہوئی سازشوں کے باوجود پاکستان کی دفاعی صلاحیت اور عزم میں کوئی کمی نہیں آئی۔