پشاور: وزیر اعلیٰ خیبر پختونخوا علی امین گنڈاپور نے کہا ہے کہ سینیٹ میں ہم نے خریدوفروخت کو روکا۔ جبکہ ناراض امیدواروں کے خلاف پارٹی کارروائی کرے گی۔
وزیر اعلیٰ خیبر پختونخوا علی امین گنڈاپور نے میڈیا سے گفتگو کرتے ہوئے کہا کہ کل انتخابات کے حوالے سے مشاورتی ملاقات تھی۔ اسلام میں شک کرنا حرام ہے اور ہم نے کوئی ایسا کام نہیں کیا جس میں شک ہو۔
انہوں نے کہا کہ سیاسی جماعتوں میں ہارس ٹریڈنگ ہوتی ہے بلکہ میں اسے ڈنکی ٹریڈنگ کہتا ہوں۔ گھوڑا تو ایک بڑا قابل عزت جانور ہے اور میں خود گھوڑوں کا بہت شوقین ہوں۔ تاہم دیکھا جائے تو گدھا بھی خدمت کرنے والا جانور ہے۔
علی امین گنڈاپور نے کہا کہ سینیٹ میں خریدوفروخت اس سے بھی گھٹیا کا ہے۔ اس لیے ہم نے فیصلہ کیا ہے کہ سینیٹ میں خریدوفروخت نہیں ہونی چاہیے۔
انہوں نے کہا کہ صوبے کی تاریخ میں پہلی بار اتنا اچھا فیصلہ ہو رہا ہے۔ اور اس سے پہلے پنجاب سینیٹ انتخابات میں بھی ہم نے یہی کیا تھا۔
وزیر اعلیٰ خیبر پختونخوا نے کہا کہ بانی پی ٹی آئی عمران خان نے جو فیصلہ کیا تھا اسی فارمولے پر عمل کریں گے۔ عدالتی احکامات کے مطابق مخصوص نشستوں کے منتخب اراکین گورنر ہاؤس میں حلف لے رہے ہیں۔
انہوں نے کہا کہ ناراض امیدواروں کے خلاف پارٹی کارروائی کرے گی۔ بانی پی ٹی آئی کے فیصلہ کی نفی عمران خان کی نفی ہے۔ اپوزیشن سے اتحاد صرف سینیٹ انتخابات تک ہے۔ اور اپوزیشن کے ساتھ پہلے 8 اور 3 کے فارمولے پر اتفاق ہوا تھا۔
علی امین گنڈاپور نے کہا کہ ہمارے امیدواروں کی جانب سے کاغذات واپس نہ لینے سے ہمیں نقصان ہوا ہے۔ اب ہمیں 6 اور اپوزیشن کو 5 نشستیں ملیں۔