بانی پی ٹی آئی کو ان کے بچے اور بہنیں رہائی نہیں دلوا سکتے، سینیٹر عرفان صدیقی

سینیٹر عرفان صدیقی نے کہا ہے کہ بانی پی ٹی آئی کو ان کے بچے اور بہنیں رہائی نہیں دلوا سکتے ہیں.

نجی ٹی وی کے پروگرام میں گفتگو کرتے ہوئے عرفان صدیقی نے کہا کہ بانی پی ٹی آئی کی رہائی خود ان پر منحصر ہے، اپنے بچوں کو سیاست میں لانا چاہتے ہیں، بچے ضرور پاکستان آئیں، تحریک چلانا چاہتے ہیں تو چلائیں۔

انہوں نے کہا کہ بانی پی ٹی آئی کے بچے قانونی دائرے میں رہ کر کام کریں تو اعتراض نہیں، بچوں کے آنے سے کوئی طوفان نہیں آئے گا۔

عرفان صدیقی نے کہا کہ آصف زرداری بطور ریاستی سربراہ اچھے طریقے سے کام کر رہے ہیں، آصف زرداری مدبر شخص ہیں ،انہوں نے حکومت کیلئے مشکلات پیدا نہیں کیں۔

انہوں نے کہا کہ پیپلز پارٹی ہماری اتحادی ہے، ہم کیوں اس نظام کو درہم برہم کرنا چاہیں گے؟ خیبرپختونخوا میں حکومت تبدیل نہیں ہو رہی۔

علاوہ ازیں انہوں نے کہا کہ چینی کی قیمتوں پر قابو پانے کیلئے باہر سے چینی منگوائی گئی ہے، حکومت عوام کو ریلیف پہنچانے کیلئے اقدامات کر رہی ہے۔